كل عام وانتم بألف خير أحبتي خدام الحسين سنه سعيده عليكم تجمعكم تحت خيمة سيد الشهداء عليه السلام ان شاء الله من المهيؤين لظهور مولانا الإمام القائم المنتظر صاحب العصر والزمان عجل الله فرجه الشريف كل عام وانتم إلى الله أقرب والى قلب مولانا صاحب الزمان أحب
دمتم بخير احبتي❤️❤️

يزهره اعظاي حنّينـــه  صحن ليج
نسيت النوم واعيوني   صحن ليج
حضره اتخيّل وگبـــه    صحن ليج
اعله بابه هلا بزوار الزجيــــــــــــــــــه

هيـــــــامي ياصلاة الحب  وصل ليـج
اتوضه بدمع شوگـــــــــي  وصلَيـــــج
اشوكت تتحقق امنيتـــي   واصل ليج
وعله گبرج اذب كل حسره بيّــــــــــــــه

علي محسن الزيادي

#العشرين_من_جمادي_الاخر
#ولادة_تحفة_الرب_فاطمه صلوات الله عليها
متباركين يا أبناء فاطمه بهذه الولادة الميمونه

هاي ليله افراح     يا فاطمه
عطر جوري فواح    يا فاطمه
ام ابيها فاطمه ام ابيها
**
فاطمه القران واحجاب السماء
وكل وكت تلهج بسمها الانبياء
جانت اتوكل بديها الفقراء
هاي اميره وتسوه كل الامراء
اشلون اوصفها اشلون     يا فاطمه
وهيه نورس الكون     يا فاطمه
ام ابيها فاطمه ام ابيها
***
والله عن الزهره ما ادري شكول
وبوصفها احتارت اصحاب العقول
هاي بنت المصطفى وام الرسول
واليحبها باجر الجنه ينول
حبها يمحي الذنوب     يا فاطمه
ومن عشكها ماتوب   يا فاطمه
ام ابيها فاطمه ام ابيها
***
انه شيعي وما يهمني عاذلي
فاطمه امي وابوي وكل هلي
بالشدايد ما احير انه وعلي
ماكو غير ام الحسن تفزع الي
لو عكس دهري وياي    يا فاطمه
بيج اكحل عيناي      يا فاطمه
ام ابيها فاطمه ام ابيها
****
بهل الولاده ابتشرت املاك السمه
ومريم امن الفرحه شبكت فاطمه
بيها حور العين ضلت هايمه
اليوم خل نهني حماي الحمه
الليله ليله اعياد    يا فاطمه
الج حبنه يزداد    يا فاطمه
ام ابيها فاطمه ام ابيها
*
صافن بحضرتها ضل وحي الشعر
والشمس ملهوفه اجتها تعذر
من ضوها الكمر ضل عايش عمر
ومن عطرها الورد ضل يشتم عطر
بالسمه ايغني الطير    يا فاطمه
جابت وياها الخير    يا فاطمه
ام ابيها فاطمه ام ابيها
****
تمت
تحسين الخفاجي

ليلة أفراح

غريبه زينب

ياغريب بكل وكت و اختك غريبه
من يقل معنى الحچي تزيد المصيبه

ماتت ام عون .... وحمرة العيون .....
من البواچي .....

..........................

من شحت اعيون الهله والشوگ سد بيبانه
احتركت مراسيل العشگ والموت مد ذرعانه
من كودن الماعنده اهل ماتنصفه الدفانه
يعرف امتون الشالته لو غربه لو خوانه

ياهضيمه وكسرت اخواطر بعيده
زينب بعازت اخو يمدلها ايده

يشوف المتون ..... وحمره العيون...
من البواچي......

............................................

هاجس سوالف كربله كلساعه مر بذكره
ياخذ حلم بي چم حرگ وسوالف اشگد جسره
المبحوح صوته من البچي لو شيع بيا نبره
ماتهم نيران البعد بس تچوي نار الحسره

حسرة الفگدت اخو بعز الضهيره
اتمنت ايشعونها بذيج الحصيره

وتمشي الضعون .... وحمرة العيون....
من البواچي

.............................................

الصفنه موگد للكبر وتاخذ الحيل الدمعه
هودرت لجمات الگلب يم طاري ثلمت ظلعه
الماحصلت بالطف شتم حصلت لازم دفعه
سومر ضوه اعيون الگمر من طفت اخر شمعه

يابو سكنه اختك اعله طواري المگابر
ضلت بحسرت اخو يغمض المشاعر

وي اليشيعون ..... وحمرة العيون ....
من البواچي

...................................................

من غمضت عين الشمع جم خيط فارگ لونه
شح السراب اعله العطش من جفوا ليحبونه
المكسور من فرگت اخو تقرا الحجي بعيونه
وضل النعش ذاك الوكت معتاز اليشعونه

ياكثر ذيج الزلم ابوكت الاميره
ويامقلهم من مشت زينب اسيره

وبان مضمون ..... وحمره العيون
من البواچي

.......................................................

طوح الحادي اعله الدفن واعيون زينب حمره
وشافوا اصابيع الاخت صوب الحسين ماشره
جاهيه مكسورة گلب وانوب هاي الكسره
يحشمون بالوادم افا يشعون بت الزهره

وين ذيج الهيبه وفياي الصوارم
غربه شايلته النعش تهضم يهاشم

ومايردون ..... وحمره العيون
من البواچي

...............................................

الاقل شرفا
كرار اللامي
#محرم_العقيلة

ماتت ام عون

(بين المدامع)


بـيـن الــمـدامـع والـحـزن
         والـدنـيـا أحـسـنهـه سـجـن

    أتـنطـر ومـاجـانـي    أشـمـنـتـظـر دفانـي

*-------------------*---------------*

بساعة الفاركت أخوتي   واني لليوم احتضر
الـوادم يشوفوني عدله   ودنيتي صارت گبر
أتـأخـرت عـني المنيه    لشوكت ابقه أنتظر
يخلص الليل بحسرتي   هيچي شيفيد العمر

            أسـهـر وأكـابــر لـلـصـبـح
            شـيصـبّـر الـصـايـر جـرح

   أتـذكـر الـولـيانـي     أشـمنـتـظـر دفـاني

*-------------------*---------------*

ماتت احلامي بعيوني  وكلشي بالدنيه أنعـدم
أشعـر الليل اليجيني   يـشـبـه الـجـيّـت سهـم
اذكـر امصاب الغوالي   ويجـرح بـروحـي الألم
والله يوميه ابـكيانـي   تـشـتـعـل نــار الـخـيـم

           تـچـويـنـي نـسمات الـهـوه
           ومـايـنـفــع الـروحـي دوه

      امـعـلـعلـه خلاني    أشـمنـتـظـر دفانـي

*-----------------*---------------*

أشـبـه الـميت تـراني   أنـتـظــر بـس الـلـحـد
أيّست محـد يجينـي   الروحي أقريت الحمد
چانت أمنيتي كفيلي   يطبـگ عيـوني أويسد
تـالي خـلانـي زمـاني   لا كــفــيـل ولا وِلـــد

           مجـروحه والمدمـع يـصـب
           شـتـئــمـل وشـاب الــگـلـب

      أتـحيـرت بحـزانـي   أشـمـنـتـظـر دفانـي

*--------------------*-----------------*

أشـبـقـه بـالـدنيـه ألـيـه   أنـدفـن حـتى الأمـل
ضلت الذكره وحسرتي  وكلشي حسيته ارتحل
مساهره وأحسب ليالي  يمته يـوصلني الأجـل
تنزف أجروحي بدليلي  والـصبـر شاب وذبـل

          أمـكـابـر وحصتـي الـدمـع
          بـالـراحـو أتـمـنـه أنـجـمـع

    وعباسي يـتلـگـانـي    أشـمـنـتظـر دفانـي

*------------------*----------------*

تحضر بعيني صورهه  كـربله بـوكت الغرب
العايش بنار أنتضاره   وينتظر موتـه صعب
الهوه يچويني أحسه   بـظـامري لمن يـطب
أتعذبت والله بحياتي   ارّوح اهـواي التـرب

          مـاتــرجـع احـبـابـي بـعـد
           أدريــهـه راحــت لـلأبــد

    مـاتـنطفي نيـرانـي   أشـمنـتـظـر دفانـي

*-------------------*----------------*

كسرت الخاطر عشتهه   دنيه راوتـني العجب
الـمـغـرب الدمعه أهلهه   وأدري الفراك السبب
يـمتـه دفـانـي يجـيني   عمـري خلصته تـعب
أتـأخـر بـدفـنـه عـليـه   أعتب وحـگـي العتب

           مـا أدري شـيـريـد الـدهــر
           عـذبـنـي والـخـاطـر كسـر

   أتـعـمـد  وأذانـي        أشـمنـتـظـر دفانـي

*-------------------*---------------*


✍خادم السيده زينب ع
الشاعر رعـد الجريخي

بين المدامع

ها يروحي    شلونها الماعدها اخو
ها يروحي           وانه لا ام لا ابو
ارتفع صوتي    وين اخوتي    كرب موتي    اشلون بيه
***
عندي اخو كلش حنين وعينه لخته
عمره ما زعلني من يوم العرفته
ذاك اخوي ال عالترب عطشان عفته
حسين جوه الخيل ويأشرلي شفته

كلي ارجعي     عليج اخاف من السحك
كلي ارجعي           دمعتج تحرك حرك
كطعوني     وعطشوني    وسلبوني    آل اميه
**
ها يروحي اعزاز كلبي فاركتهم
بكربله وذيج الصحاري ضيعتهم
شلون بيه الموت اجاني وما شفتهم
جنازتي ايشيلونها اخواني ردتهم

بلايه اخوتي     جنازتي وحشه تصير
بلايه اخوتي    راح حتى ابموتي احير 
فاركوني   وضيعوني    وما اجوني   للمنيه
****
من يكلهم ماتت ام عون بحزنها
اخوان ماعدها وتجي تحضر دفنها
من يكلهم شدو بهيده جفنها
حيل زينب بعده يوجعها متنها

من يكلهم     اصياطهم ترست كفاي
من يكلهم    بهيده ديرو عليها ماي
الشمر ذبني   وظل يسبني    شكد ضربني    وشد اديه
*
امنيتي ازورن كربله كبل المنيه
وبين اخوتي اكعد  وراويهم اديه
راح اموت بغربتي ومحد اليه
وراحو ايدفنوني اكلهم يم رقيه

بنيت اخيي   حسين جان ايحبها حيل
بنيت اخيي       بالسبي راووها ويل
طشت شافت    وبويه صاحت   تالي ماتت  حسره هيه
**
اوكف عله التل وصيحن ها يالعزاز
مو مثل باقي الجروح اجروحي تمتاز
يهلي تدرون الجنازه اجتاف تحتاز
وانه حتى اجنازتي ما بيها جناز

ها يخوتي     تربي عالباب العيون
ها يخوتي     يعني أيس ماتجون
ضاع كلشي   ومنو بنعشي   راح يمشي   ويحن ليه
*
جنازتي عله الكاع ظلت يا حسرتي
ماكو واحد شالها وحن الغربتي
وكامو ايحشمون بالناس الدفنتي
وين جنتي وهسه زينب وين صرتي

ها يزينب    ما كو اخو الليله اعتناج
ها يزينب        وحتى محد شيعاج 
ياهو انشدج    حضر عندج   وحفر لحدج    يالسبيه
***
تمت
ميثم العمري

ها يروحي

ارزقيني السنه اعله الشام واطلعّ حرگتي ابدربه
امحضر عيني اريد ابچيچ واعيش ابـابج الـغربه
واذا ماجيت گولي اهنااا مــات الـخــادم وگلبه

مو مرتاح اجــي رزقيــني تـعبان
الرزق مـرات انـسان اعله انسان
اذا ماجيت كون وروحي بالموت
يم عون وعليچ ام عون عطشان

عبدج طلب طلبه
بجروحه البكلبه
يسجد على العتبه == مولاتي

سجلي ابرزق اسمي
اكضيلي بس حلمي
ويه الخدم امشي == مولاتي
=========================

وحك ذاك الدرب والبر حالي وروحي يردنچ
انه الكاضي العمر متعوب المهن بلكي ازورنچ
خايف لا تصد دنياي ما روح وانسئل عنج

اوعوز الخادم الما راح متعوب
احسبهه واخافن موش محسوب
عليج الباب الاخظر والمناره
بقافلت الوجع خليني مكتوب

من بابج اليهظم
بروحي كلشي احرم
بس كون اجي والطم == مولاتي

يكسر بقه الخاطر
يا كلبي ظل حاير
لو ما رحل زاير === مولاتي

=========================

يسلطانت نساء الشام ورؤوفت خوه الامداره
اشكد تكسرني الاحجايه صدك متروح الازياره
امحضر كلشي بلكي الله يتغرب خادم الداره

وين الله ويصير اسمي زاير ام عون
وبعدهه خل اموت وتغمض اعيون
صدك امشي وتصير احلامي عالباب
والطم عالوجه ويه اليلطمون

بدموعي والشهگه
افزع الچ حركه
وجفني ولا طبكه === مولاتي

يا حلمي بس رايد
عالگبه وايشاهد
فظلج عليّ زايد === مولاتي

=========================

مثل ذيج السنه ما ريد كلبي اتعذب ومحروك
اشبك باليروح اعليج خليني السنه المشبوك
يا حظي واصير الراح لبچيلچ بچي المبيوك

الماي الما مشه بكلبج والاخيام
ابثوابج راح اوزعنه خدام
منچ نضره واصبح خادم ال زار
ومشكوله اعله ذمه جفني لو نام

الخادم بقه يمج
سهليله ويخدمج
بعد اهلي يا اسمج === مولاتي

رايح شبك رايح
متحضره عالنايح
وابكلبي بس صايح === مولاتي

=========================

شنهي الشام ما تبجيج يا وكتج ما نصح وياچ
نعيتي امن النحر للموت و هسه محد الينعاچ
قوافل كلهه ظيم هواي راحت تلطم الملكاچ

ويبدون البجي من گلب محروك
الچ وادموع وعـله الطبن السوك
من اول دخـول الــحد الحـسين
لحد العـثروهـن مـن على النوك

وامكابل النادم
تبچي الج وادم
يسيدت هاشم === مولاتي

فاتحتج أجبيره
خدامج الغيره
تترس وجه ديره === مولاتي

=========================
سجاد ابراهيم الكعبي

مولاتي يا غريبه

يازينب

الله وياج كلتلج يالغريبه
هيين الموت يمن شلتي المصيبه

عذاب عذاب *خلصت حياتج
عذاب عذاب *ولحد مماتج
يعمه
**
امنين ابدي قصتچ*
يالگضيتي ابحسرتج*ولعمر عبره
بالمصاب امحجبه *
الموت اسهل نايبه*بالصار وجره

وگفت التل اعله طولج ناره تبقه ساريه
ومن سمعتي اضلوع ابويه تنطحن بالعاديه
هذه ياموت اليهمج اعله المهازل ماشيه

وگفت التل تهد اجبال چانت
ولي اصعب عليج الحره بانت

عجيب عجيب *كل امنياتچ
عذاب عذاب *ولحد ممماتچ
يعمه
*
هذه ياموت اليهم*
متي من شفتي الزلم*طرت خيمنه
موتچ بطف كربله*
ياملاذ العايله*وكهف الحرمنه

انه ياعمه العليل وچنت اعاين غربتچ
شفت حيره فوگ وجهچ من نضرت الحالتچ
تعثر الوين اعله صوتج كلهه صرعه اخووتچ

وفوگ الحسين نضرتي الخيل جالت
وبينچ اوبين اخوچ الگوم حالت

غريب غريب *يسمع بكائچ
عذاب عذاب*ولحد مماتچ
يعمه
**
اشلون محسوب العمر*
اليبدي من باب وكسر*ضلع الزچيه
اوكبرتچ تالي بذبح*
وراس اخوج اعله الرمح*ونتي سبيه

اشلون ما حسبنه عمرج گاضي بالضلع ونحر
اوصورة حسين وغربته وراسه مصيوب ابحجر
ولجسد شفتي انتي الخيل بضلوعه اتعثر

گلبچ اشلون بقه لليوم نبضه
وصدر الحسين يشوف الخيل رضه

نحيب نحيب *يالحره ذاتچ
عذاب عذاب *ولحد مماتچ
يعمه
****
العين متروسه ذبح*
مايهمچ كل جرح *لو چان موتچ
ياجرح مثلچ جره*
حره تمشي اميسره*ومذبوحه اخوتچ

ياغريبه لو اگلج ينتفض بيچ الالم
انتي ميته من سمعتي طاح چف شايل العلم
من ندهتيله افزعلنه خويه حرگوهه الخيم

ياهو الاصعب عليج اليوم شوفه
ساعت الموت لو طييحت چفوفه

حبيب حبيب*ينطر لقائچ
عذاب عذاب*ولحد مماتچ
يعمه
***
الموت مفتاح الحزن*
اگلوب من عنده توون*ولفرگه صعبه
لاچن انتي ابموتتچ*
شفت ماتت غربتچ* يالعشتي غربه

الموت راحه ايصير لمن جرحك ايفوق الصعب
ومن تشوف انته عزيز اميسر وتچهب غرب
ولذبح اهلك يشوفك وعله ديوانه تطب

اوموتچ الحان وودعچ يالعقيله
وتبقى الاحزان اوآهاتچ طويله

ولهيب لهيب *يبقه ابغيابچ
عذاب عذاب *ولحد مماتچ
يعمه
**
علي سليم الحسناوي

الله وياج يالغريبه

الليله ياحيدر تموت چلمت المسبيه
ياعلي شييعهه گوم ماتت العلويه

من گبرك اتعنه يكرار
لسه ابگلبهه رهبت النار
زينب زينب
**
يبو الحمله يبو الكلفه انهض زينب الماتت
كتلهه النوح عالخوان ونواع الهضم شافت
يحيدر ولتلوحه النار رهبته ابگلبه ماراحت
ومن ذاكه صريچ الخيل عزيزت گلبك الخافت


شبعت هضم بنتك علي بنص الفله خلوهه
محتاره مابين الحرم وبين الخيم حرگوهه


ماناسيه كل الجره وصار
لسه ابگلبهه رهبت النار
زينب زينب
**
اجاهه الموت ياكرار وتريد اليوم ولياهه
اذا ماتحضر الليله تهييج امصاب ذكراهه
هم ضلت وحيده اهناك امن اهلهه مامش الجاهه
تتلفت على الفزعه ولا سامع الشكواهه

ولعاش بمصاب السبط گلي اشيضل ابعمره
شافت حسين اعله الارض ولخيل تطحن صدره

ومحتار يتوچه اعله محتار
لسه ابگلبهه رهبت النار
زينب زينب
**
ساعات الممات اتريد حيل ويكفي بيهه الصار
هوه بس وقوف التل يهد  الحيل ياكرار
وركضهه وهيه بالخمسين وبذيال العبايه النار
سلب منهه النفس ولروح وخله بالگلب تذكار

وموقف الخيمه والجسد وصار السعي مگصدهه
الخيل يم جسم الاخو وبالخيمه نار اتردهه

وضل اعله بال الحره تذكار
لسه ابگلبهه رهبت النار
زينب زينب
**
يبوهه كون تحضرهه وغريبه لاتخليه
الغربه عشره وي زينب طويله وحيل تاذيهه
عگب ضل الگمر عباس ياهو الصار حاديهه
مشت درب الصعب ممشاه اسيره امچتفه اديهه

اشيبقاله من عمره اليطب سوگ وتصدله الغربه
المضمومه من شوف النضر تنشاف هاي الصعبه

هيچي وكتهه اعليهه من دار
لسه ابگلبهه رهبت النار
زينب زينب
**
انضمت زينب امن الناس وتالي هم سبتهه الناس
وعگب ذيج الكفاله اشلون شنهو المرهه يا احساس
وفوگ السبي اتشوف حسين باقي عالرمح بس راس
اولو نادت يعباسي هم فوگ الرمح عباس

عاشت يوالده عمر يوميه لوعه وصدعه
وليوم وافاهه الاجل ومافرگته الدمعه

ضعن المنايه الليله شو سار
لسه ابگلبهه رهبت النار
زينب زينب
**
علي سليم الحسناوي

ماتت العلوية

صبرك يمسجون
---------------
حيرني امرك   اوانته بصلاتك     دمعاتك انهار
حيرني امرك   اشصار بحياتك   ياموسى والنار
تجري بالعيون      صبرك يمسجون
اني حظرتك
------------
يموسى يا ابن جعفر    اجيتك اوالدمع يجري
يروحي
يعمه بظلعي وناتي     تجبر لوعتي اوكسري
يروحي
انه زينب انه الجرحي       كتب بالطف حزن عمري
يروحي
غربتك تشبه غربتي        دهرك ظالم اودهري
يروحي
جارحني وضعك     ياعمه شفتك     نتشابه اهواي
جاحني وضعك     بكليبي صحتك     ظامي اوالماي
بيد اليكرهون       صبرك يمسجون
اني حظرتك
---------------
المصيبة المرت بحالك     مصيبة طفي اوايامك
ثكيله
بحياطين السجن صوره       ترسم ساعت الامك
ثكيله
سجدت اوجرحك يسولف       مثلي قصة ايتامك
ثكيله
وحيد اوغربتك غربه    غريب اوناحله اعضامك
ثكيله
ماادري اشبقى      اوسجنك حرامي     بايك ادموع
ماادري اشبقى      لحركت خيامي     حاني الظلوع
تلجم بالظنون           صبرك يمسجون
اني حظرتك
-----------
عله جدك يبوالاجواد     وحيد ابغربتك حاير
عجيبه
تعاين زمرة الظلام       دارت اوالزمن جائر
عجيبه
تداري وحشة الوديان    اونته بوحشتك ناطر
عجيبه
ظلام اونورك الوهاج    بسجنك حاظر اوناصر
عجيبه
عجبني صبرك     رغم الماسي     هادئ الروح
عجبني صبرك    ماكو اليواسي   اوتنزف اجروح
بين اليضدون          صبرك يمسجون
اني حظرتك
--------------
يتاريخ الكسر بينه       ذبحنه بغدره وصنامه
جعلهم
يذبحون الوفي طبعه        يسلبون بحقد ايتامه
جعلهم
من يزيد الطاغي ذاك        لهارون الكره خامه
جلعهم
سلاله ورثت جاهل       يدرس زمره ظلامه
جعلهم
تكرهنه عمه      راد بجتلنه     يمحي السلام
تكرهنه عمه    تلجم جرحنه    صاحب ظلام
اوبينه يذبحون                صبرك يمسجون
اني حظرتك
-----------
اذا انته بسجن سجان       شمرهم بالطفوف اهناك
ظربني
ظرب متني اوصحت لا لا     يعمه اوهسه انه اوياك
ظربني
سطرني بعيني من ناديت    يكافل خويه خذني اوياك
ظربني
عله وجهي مثل ما            سطر امي اللذي عداك
ظربني
سطرني اللذي       اواني بخيامي     كدام الصغار
سطرني اللذي     كلبي اللي ظامي    بحواله منهار
نفس اليسمون        صبرك يمسجون
اني الحظرتك
-----------
لجن باجر يجي القائم       يجي ابثاره اونشاهد
ثورته
يجي اليكطع نسل منهم      اهو قائد وابن قائد
ثورته
تفيض الامه بالفرحه     اهو بسيفه بطل واعد
ثورته
تبيد الظالم اوتحكم        عدل اوالشيعه تتواعد
ثورته
ابثار الغوالب      لمن يطالب      ماتبقى اي شام
ابثار الغوالب     سيفه يحاسب         يهدم اصنام
الشيعه ينطرون         صبرك يمسجون
اني حظرتك
-----------
كلمات حسنين المحنه